Bharata

ನನ್ನ ತಾಯಿ ಭಾರತಿ, ನಾನಿವಳ ಸಾರಥಿ;
ಇವಳ ಸಂಸ್ಕೃತಿ ಸಾರದಿ, ವಿಶ್ವವೆಲ್ಲ ಕೀರುತಿ.
ಸತ್ಯ–ಧರ್ಮ ಸನ್ನಿಧಿ, ಶಾಂತಿಯೇ ಇವಳ ಪ್ರಕೃತಿ;
ಭಾರತಾಂಬೆಯ ಚರಣಕೆ, ನಾ ಮಾಡುವೆ ಆರತಿ.

ನನ್ನ ದೇಶ ಮಂದಿರವು, ಹಸಿರೇ ಇವಳ ಹಂದರವು;
ಕೋಗಿಲೆಗಳ ಗಾನವು, ವೇದಘೋಷ ಮಂತ್ರವು;
ನವಿಲಿನ ನಾಟ್ಯವು, ಘಂಟಾನಾದ ತಾಳವು;
ಗಂಗೆ–ಯಮುನೆ ಧಾರೆಯು, ಪವಿತ್ರ ತೀರ್ಥ ಸಾರವು;
ಇವಳ ಸೇವೆ ಪೂಜೆಯೆಂದು, ನನ್ನ ಬದುಕು ಅರ್ಪಿತವು.

ಸಹ್ಯಾದ್ರಿಯೇ ಬಾಗಿಲು, ಮಾವು–ತೆಂಗು ತೋರಣವು;
ಹಸಿರ ಹೊಲವು ಬಿಡಿಸಿವೆ, ಭತ್ತ–ರಾಗಿ ಚಿತ್ತಾರವು;
ಇವಳ ಒಡಲ ತುಂಬಿವೆ, ವಜ್ರ–ವೈಢೂರ್ಯ ಕಣಜವು;
ಹಿಮಾಲಯವೇ ಮುಕುಟವು, ಸಾಗರವೇ ಪಾದಪೀಠವು;
ನನ್ನ ತಾಯಿ ಭಾರತಿಯು, ನೀಡಿಹಳು ಸುಖ ವೈಭೋಗವು ;
ನಮನಗಳ ಅರ್ಪಿಸುವೆ, ಇವಳೇ ನನ್ನ ದೇವಿಯು.

ಕವಿ ಶ್ರೇಷ್ಠರ ನಾಡಿದು, ಮಹಾಪುರುಷರ ಬೀಡಿದು;
ಧರ್ಮ ಕರ್ಮ ಸಾರಿದ ಸಜ್ನನರ ಸವಿ ಗೂಡಿದು
ಅಮರಜ್ಯೋತಿ ಬೆಳಗಿಸಿದ, ವೀರರ ತವರೂರಿದು
ನನ್ನ ತಾಯಿ ಭಾರತಿ, ನಾನಿವಳ ಸಾರಥಿ;
ರಾಷ್ಟ್ರರಥವ ನಡೆಸುತ, ನಾ ನಾಗಬೇಕು ಹಣೆಯ ವಿಭೂತಿ.