آفتاب عالم شاہ نوری

اُس کی بستی سے کبھی اپنی سواری جائے
میں اُسے دیکھ لوں اور دل کی خُماری جائے

خود کو ڈھوتے ہوئے میں نے کئی صدیاں کاٹیں
اب میرے کاندھے سے یہ لاش اُتاری جائے

وحشتیں ہونے لگیں شہر کی اِن گلیوں میں
کسی ویرانے میں اب عمر گزاری جائے

لوگ جاتے ہیں امیروں کے گھروں پر ایسے
جیسے مسجد کی طرف کوئی بھِکاری جائے

اِس لئے بھیڑ میں تنہائی کا شیدا ہوں میں
مطلبی یاروں کی اب زِیست سے یاری جائے

رب سے ہر لمحہ دعا کرتا ہے عالم بھی یہی
حالتِ سجدہ ہو اور جان ہماری جائے