Jupeon

Ah, Ah, Ah, Ah, Ah, Ah, Ah.
Si ces sacrées lureonnes
Veont porter les marreonnes
Ah, Ah, Ah, Ah, Ah, Ah, Ah.
Et bin vla c' que nous f' reons
Nous mettreons des cotreons
Vous avez vu tertous' dins les journals de mote
Quoi c' qu'ein' de nos tailleuss' vient d'invinter
Les feimmes c'n'ainné' chi, veont porter des culottes
On veut décidémint nous démonter
C' qui fet qu'on n' verra pus les madames à z'imblaves
Qui s'in veont trottinant, et in f' sant leus p'tits pas
Risquant de s'ingambier dins leus ropes à z'intraves
D' leus guibol's i pourreont agrandir el compas
J’ vas vous deonner m'n'avis, puisqu'i feaut que j'vous l' disse
Mi j'in suis fin contint, on l' comprindra
Pas' qu'on n' s'ra pus jamés trompés su l' marchandise
Avant de s' marier su' c' qu'on prindra
Les ceux qu'i aim'tent d'avoir les deux g'noux qui s'orwèttent
Ou bin les gamp' arqués comm' des chasseurs à g'veaux
Ou des gamp' sans mollets, crass' comm' des alleumettes
Pourreont tout a leu n'aiss' queuzir es qu'i leu feaut.
Che s'ra dins les famill's ein sacré bénifice
Quand à t' marreonn' i'ara ein bieau grand treau
El feimm' pour plaire à s'n'heomm' f'ra ein p'tit sacrifice
Elle ara toudis l' pièche à mette au treau
Ell' te dira : pauf'fieu, ch'est vrai que te n'd'as qu'eine
I’est temps pour l’assemblé et te n' peux pos partir
I'a moyen d' s'arringer : attinds j' vas t' donner l' mienne
Mes n'orviens pos trop tard, mi aussi j' deos sortir.
On in fes'ra in soie, in drap et in futaine
Des collant's et des larqu's més mi c' que j' sés
On d'vra fair' pour les feimm' des nouvell' pichateines
Pour nous les heomm's, i n'd'a d'jà pos assez!
Che n' s'reot là qu'ein d'mi-mal, més coss' bin pus certaine
Ch'est qu'on va cor saisir cell' nouvell’ occasieon
Et cha n’ va pos trainer, cha s'fra l'ainné prochaine
D'augminter à l'av'nant nos p'tit's contributieons.