انتي

تعوا تَ نْحبّ

تعوا نرفَع أصابعنا الوسط
للكلّ
تعوا تَ نْضلّ
نتدرّب على الضّحكة
تعوا نِحكي
بلا ما نخاف ..

تعوا نزرَع شجر صفصاف
عَ حدّ البينّا وبينُن
تعوا ننسى عناوينُن
تَ نِكتُب منّنا وفينا ..

تعوا تَ نْسكّر المينا
عَ كلْ شي راح…

بلا ما نغامِر ونرجَع
تعوا نِطلع على الفكرة ومعانيها
تعوا نِشبَع… بيكفّيها
بَلدنا جوع
تعوا تَ نْحدّد المغزى
من الموضوع
"ولو صِعبِتْ حقيقتنا..
بِيكفّي ما الكذب أصعَب "

قَبل ما تِتعب الكلمة ..
وأنا إتعَب
تعوا نلعَب… بِأسماؤُن
تعوا نِهزأ بِ عَلياؤن
ت نتساوى بِنفس الذّلّ

حِقِد عَ الحِلّ
عم يكبَر عَ إيدينا
وقَصد عم نِحضنو ونحميه
إبن "فائض" عن الحاجة
وإجا غلطة بِ شهوة دمّ
شو بدكُن فيه !!
تعوا نِرميه ..
بالسلّة الجنب بابُن
رح يلاقي بِ بيتُن إمّ ..

تعوا نِلتَمّ شي مرّة ..
ولو جَكرا ..
تعوا نِهتَمّ بالبُكرا
تَ يضوي البُكرا ..ويعلّي

تعا ياصاحبي قلّي
شو صاير بينها وبينَك
تعا إمسَح دَمع عينَك
تَ نتقاسم حنين الملْح
تعا نوقَف عَ روح الجرح
وِ نْصلّي كَم دْقيقة…

تَعي يا بنت يا رقيقة
عَ أرض بْ طولها ربينا
تعي نِزرعها موسيقى
تَ نِحصُد كَم كَمنجا وعود

تعي نِسقي أغانينا
تَ تِكبر حبّة العنقود…

تَ يسكَر جيل
ويآمن بِ صوت الرّب

تعي نقلُّن
تعوا تَ نْحبّ ..