Jaman

مِن يَوم ما غِبتْ يا مَحبوب كَم قَدْلَكْ
هَل أنْتْ مِثْلِي تِعِدْ لَيَّام بِـا الِّيلَهْ؟

جاوِب سُؤَالِي وَنَا شَارُد عَلَى سُؤْلَكْ
وكُلّ واحِد يِوَضِّحْ ما سَبَب سُؤْلَهْ

إسبوعْ مِن يَوم ما عَمّار قَدْ شَلَّكْ
إسبوعْ والقَلْب يِتْزَوَّى مِنَ العِلَّهْ

إسبوعْ والمَوت يِتْنَوَّى عَلَى خِلَّكْ
والقَهْر ذي بي جِبَال الأرْض مَتْشِلَّهْ

إسبوعْ مِن حين عَنّي إِنقَطَعْ وَصْلَكْ
إسبوعْ يا مَن حَرَمْت الأبّ مِن طِفْلَهْ

إسبوعْ والعَين دَمْعِه دَمّ مِن أَجْلَكْ
إسبوعْ والنار تِتْسَعَّر فِيَ الذِّبْلَهْ

مَن عَلَّمَكْ بِالفِراقْ إتْصُدّ ما قَلَّكْ
إنّ الرَّجُل با يِمُت لا فارَقُه خِلَّهْ

وَاللَّه وَاللَّه لا بَعْدَكْ ولا قَبْلَكْ
إنْت السَّلا والحَلا وانْت المُنَى كُلَّهْ

أحِبّ وَجهَكْ ومِتْهَبِّلْ عَلى طُولَكْ
وأذُوب لا قَد أَتَتْ مِن مَبْسَمَكْ قُبْلَهْ

يا غَيْمَةَ الحُبّ هِلِّي قَبْلَما أَهْلَكْ
فِي داخِلِي الهَمّ والأحْزان با الجُمْلَهْ

يا وَيْل قَلْبِي مِنَ ايّامٍ بِلَا وَصْلَكْ
تِمْشِي الثَّوانِي ثَقيلَهْ والسَّهَر ذِلَّهْ

وَداعَةَ اللَّه يَا أجْمَل مَنِ اسْتَمْلَكْ
القَلْب واسْتَوْطَنَ الوِجْدَان واحتَلَّهْ