аа

Көңлімді сағыныш ораса,
Сезім де билейді таласа.
Осылай мұңайған шақтармен,
Барады жалт етіп қараша.

Тым-тырыс... Естілмей бақта жыр,
Құстардың қиқуы жоқ қазір.
Қараша құрығы жетпейтін,
Күн нұры төгілген жақта жүр.

Биылдан нелерді күттіңіз?
Көңілге нелерді тұттыңыз?
Асығып ертелеу түсті қыс,
Асығып ертелеу бітті күз.

Асығыс бәрі де, арман да,
Мен ғана қозғалмай қалғам ба?
Мен ғана қап қойдым сол маңда,
Қоңыр күз ән салған орманда.

Жүрегі талайдың мұз, білем,
Мен ғана өткенге үздігем.
Асығып неғылам...
Қимаймын,
Қимаймын кешегі күзді мен...