Жігерлендіру

Алса да тағдыр мың сынға,
Еңсеңді көтер сен сынба.
Өткізбе бекер уақытты,
Қызықпа ойнақ жыртыңға.

Асып өт ауыр өткелді,
Қорықпа қайтпа қымсынба,
Аямай жанды төк терді,
Болуың үшін шын тұлға.

Алыстан сыйлас бол қашық,
Жолама жұқсыз жылтыңға.
Келмесе қалғың сор басып,
Жолама тексіз сылқымға.

Сындардан түрлі сүрінбе,
Дұшпан тұр күтіп сыртыңда.
Абырой арың бүлінбе,
Өзіңді өзің жер қылма.

Тайқыма түзеу жолыңнан,
Құл болма зұлым құлқынға.
Келеді бәрі қолыңнан,
Қызықпа құнсыз жылтырға.

Алдыңа келсе жарлы адам,
Көмек бер қарап құр тұрма.
Атанба арсыз оңбаған,
Өзіңді өзің қор қылма.

Білегім менің мықты деп,
Жүрегім батыл түкті деп,
Болсаңда қанша ептірек,
Тұрсаңда аспан көк тіреп,
Әлсізге қарап жыртылма.

Бұйырсын десең адал жол,
Істерден жақсы тартынба.
Өзгерме әділ адам бол,
Пейілді таза тар қылма.
Өшпейтін жалын алау бол,
Жасыңда жайна жарқылда.

Шырылдап шындық айтып өл,
Келсе де ажал алқымға.
Келмесе сүргің жалқы өмір,
Сылбырды епсіз жар қылма.

Мінезің жұмсақ жайлы бол,
Пайдаңды тигіз халқыңа.
Сүресің жақсы жайлы өмір,
Атайды халқың нар тұлға.

Көр соқыр болма тәкәппар,
Ажалдан бұрын өлесің.
Тіріңде игі іс жасап қал,
Рахатын кейін көресің.