КИЗИМ

Dada degan tilingdan sening.
Jajjigina qulingdan sening.
Alloh bergan totli ne'matim.
Munchoq ko‘zim qizginam mening.

Hayotimning quyoshi o‘zing.
Biram shirin so‘zlagan so‘zing.
Yosh ko‘rmasin sira ham ko‘zing.
Munchoq ko‘zim qizginam mening.

Akasining singlisi bo‘lib.
Birga o‘ynar quvonib, kulib.
Bag‘rim turar ular-la tulib.
Munchoq ko‘zim qizginam mening.

Ishdan kelsam mehnatdan tolib.
Dada deydi opichlab olib.
Charchoqlarim ketadi qolib.
Munchoq ko‘zim qizginam mening.

Osmonimning yulduzi o‘zing.
Qaro tunim kunduzi o‘zing.
Kelajagim ildizi o‘zing.
Munchoq ko‘zim qizginam mening.

Qiqir-qiqir kulishi guzal.
Qadam tashlab yurishi guzal.
Menga berdi taqdiri azal.
Munchoq ko‘zim qizginam mening.

Ko‘rib deysiz xuddi qo‘g‘irchoq.
Ko‘zi shahlo huddi ko‘zmunchoq.
Onasiga, menga ovunchoq.
Munchoq ko‘zim qizginam mening.
Sobit qizi Dilnuram mening.