Йондоззарым Илай икан

Йондоҙҙар ҙа илай икән -
Таң атыуға ысыҡтар.
Һалҡын ысыҡтарҙы кисеп,
Таң алдынан юл сыҡтым.
Йондоҙҙар ҙа илай икән,
Илай һалҡын төндәрҙә.
Һинең дә күҙ ынйыларың
Һеңеп ҡалған мендәргә.
Сит йондоҙҙарҙа эшем юҡ,
Бар минең үҙ йондоҙом.
Йөрәк ялҡындарым менән
Иретермен йән боҙон.
Йондоҙҙар ҙа илай икән,
Илай икән түгелеп.
Ә шулай ҙа, (сере ниҙә?)
Йондоҙло төн күңелле.