وزززز

صعب لا منّك فشلت وصعب لا منّك لقيت
إن من يكره نجاحك يدري إنك ما نجحت
أمس ضقت ورحت أقلب ذكرياتي وانتهيت
عند صورة طفل صوته مثل صوتي لانجرحت
وش مثل لا والله إلا هذا أنا يوم ابتديت
أنطق حروف تلعثم في لساني لا أنمدحت

هذا أنا يوم الحياة فنظري عشرين بيت
ومسجدين ومدرسة من طين كم فيها استضحت
هذا أنا أصبحت أتمتم هذا أنا حتى بغيت
أختنق بس القدر عيّا على موتي وطحت

وصاح صوت الطفل فيني: “أنت من وين رتميت؟”
قلت ... أنا المستقبل اللي فيه كم همت وطمحت
أمس كنت أبيك تكبر بس والله لو دريت
إني اللي عشت لجلة مت عندك واسترحت

لو دريت إن الزمان يجر رجلي ما عدّيت
ولو دريت إن البحور بلا موانئ ما سبحت
كان دربك لي طويل وكلّ ما شفتك هويت
قلت لك كبوة جواد وما كبيت إلا وجمحت

ليه تسمعني وتمشي ... آه ليتك ما مشيت
وآه ... ليتك من كثر عثرة الأيام انتصحت
ضاعت أحلامي وضل الحزن فيني واهتديت
للطريق اللي يودّيني على دمعي ورحت

يا الحزن ليتك مثل دمعي وتنزل لا رقيت
بس أعرفك لو مسحت الدمع تبقى ما نمسحت
كان حلمي في وجود إنسان يبكي لا بكيت
وصار حلمي في وجود إنسان يفرح لا فرحت

كنت أشوف الناس مثلي كل ما جعت وضميت
ما دريت إن الأوادم ناس فوق وناس تحت
آه يا أول ذكرياتي خذني بحضنك نسيت
لأسئلك عن وجه أبي اللي معه ياما سرحت

خذني بحضنك أبغفى ... ياااه مبطي ما غفيت
وإن لمحت دموع عيني سوّ نفسك ما لمحت
خذني بحضنك وبعثر في جروحي وإن قضيت
هز لي كتفي وقلي ... عيب تبكي لو سمحت

اضحك وعلم زماني من أنا ومن وين جيت
طق باب الحزن واصرخ فيّ لا منّي فتحت
وضمني يمّك وكمل ضحكتك لا من بكيت
ودي أذكر كيف كانت ضحكتي لا من فرحت