Sezim

1.Махаббаттың тәтті дәмі таңдайымда,
Таңдай қағып, таңғы құсты тыңдаймын да,
Шуақты сол күндерді еске аламын,
Қайталап жазды ме екен маңдайыма?
2.Іздеймін сол сезімді жаңа туған,
Жанымның пәктігінен жаратылған.
Қуаныштан жүрегім аттай тулап,
Кірпік қақпай қиялдап таң атырған.
Қ/р
Қуаныш та құралады сезімдерден,
Бақыттың да мәні жоқ сезінбесең.
Ғұмырыңда тәңірің өлшеп берген,
Шынайы ғашықтықты сездің бе сен?
Өрілген көркем сөздей өрнектелген,
Жігеріме елеулі ерік берген,
Ескірмейтін естелік жадымда жүр,
Қыр соңымнан қалыспай еріп келген.
Тереземнен сары шымшық сығалайды,
Бүгіп тұрған сырымды сұрамайды.
Әнін салып шырылдап біраз тұрды,
Шалғайдағы еске салып құралайды.