Trrrt

يا رِيَاضْ اصْهِيْبْ لا تَأْمَن وتِفْرَحْ
الفَضايِحْ آتِيَه يا بُو الغَنَاجَهْ

لا تزايدْ بالطَّهاره يا مُفَلْطَحْ
الذُّنوبْ اليومْ تِقْطُرْ مِن زُجاجَهْ

يا مُدَهَّنْ يا مُمَرَّخْ يا مُمَسَّحْ
أَحْسِبَكْ ذِيبْو وآخِرْهَا دِجاجَهْ

بُندقكْ ما يَوم قد دَوَّى وقَرَّحْ
ما معكْ في ساحَةَ المَيْدان حاجَهْ

مِهْرَتَكْ إنَّكْ طِوَالِ الليلْ تِلْجَح
والمُتْر ذي رَكَّبَكْ طَفَّى سِراجَهْ

كُلِّ ما قلنا عَتِسْبِرْ وانْت تِشطَحْ
فرحتَكْ لافي قَضايا لِلْبِذَاجَهْ

الفِعالْ الفاضِحهْ تَرْدي وتَطْرَحْ
قيمَةَ الإنسَانْ ما تسوى نَعَاجَهْ

نَرجِسي بَطَّالْ يَاكُلْها ويَبْطَحْ
يِشبِعَكْ هَدْرَهْ ويِمَكِّنْها لَغَاجَهْ

مِثلْ كَلْب الخَطّ طولْ اليومْ يِنْبَحْ
آخِرَهْ يِلهَثْ ويتسَايل لُجاجَهْ

لا مشى اِتبرطَعْ ولا اِتمَلْعَن تِوَسَّحْ
ولا شَبِعْ يِبْطَرْ وتتْنفَّخ وِدَاجَهْ

لا نَشَرْ يِشقَى يرِدْ كُلُّهْ مُجَرْوَح
نهايتَهْ كمْ يشتغِلْ بين السِّباكَهْ

أهبل امنَهْطَلْ وناموسُه مُدَرْدَحْ
سُبلُتَهْ ذي با تِسرِّعْ في هلاكَهْ

والمُصيبهْ يومْ يَركَبْ ويومْ يَدنَحْ
سَرسَري ما عاد دَرِينا وشْ عِلاجَهْ

سابِرَهْ مِنْ يومْ ما قايدْ تِشَرْشَحْ
خارِبَهْ لا صاحِبكْ أنوَى الزَّواجَهْ