vita6

’E vvote penso a comme fosse stata ’a vita mia si nun t’avesse avuta.
Pe quali strade avesse cammenato,
e quali porte aperte..e quali chiuse.
M’affaccio a ’nu balcone scanusciuto,
che resta mieze chiuso e miez’apierto!
M’arricordo ricorde mai vissuti
e me scordo ’e ricorde che so’ veri!
Astregne mane e chi nun c’è mai stato..
faccio progetti ca nun so’ mai nati,
e po’ me sento comme a ’nu ’mbriaco
ca nun trova ’na cosa che ha perduto!
E pure a te... te veco miez’’a gente che nun cunosco
e che nun te capisce… Si’ sempe tu...ma comme fusse n’ata..
e pienz’’a mme….ma comme fosse n’ato…
E po’ me sceto ’a chisto suonno brutto,
te veco, comme sempe, a me vicina,
e penso che ’sta vita che aggi’avuto
era l’unica vita ca vulevo!