Sawidak meh punjul opat

Pasampangan pasampangan nu kasungsi kaliliwati
Lir ombak banyu ngeyong boyongkeun ngayun ambing nyutat lampah
Natrat walatra nyimpen ciren mandiri : cunduk mangsa gesan nguger raehan
Nu ngumbara liwung dipuser pancatengah
Wanci mingkin heuret nalikung kasadaran obahna pajamanan
Raga geus suda bisa neleuman pirang pirang angkara murka
Meweuh ku retorika tug ngadoni laku minculak
Nyolok mata nobros genggerong mautan hinis jeroeun jajantung
Estu kasaksen teu ngemu rusiah jagat kahirupan geus kalampah
Kakawasaan satemena direbut ku cara kotor katideresa
Ning teu beda !, sakarupa eta keneh eta keneh
Sawidak meh punjul opat
Bolon gumincir teu nginjem mata teu nginjeum pangrenge
Nalika lembur burakrakan diranjah kaom radikalis
Pangawasa ngadahup ka pangusaha, kaum komprador maluncereng
Lain lantaran ngarenge tembang genjer genjer silung wirahmana
Kakawasaan kudu ditekuk sanajan rahayat tutumbalna
Ear sabot para olot lembur ting kecewis mertengtangkeun marbot masigit nu tinggal ngaran
Dirogahala ditunggel beheung dijieun papaes mimbar masigit