No Nerzas Nudda

Tue ses una, tue ses cudda
Ses sa Venere c'adoro
No!! No nerzas nudda
Faeddat su coro..........!!

Istanotte ne isteddos ne luna
B'at in chelu solu nues e bentu
Ma in ojos tuos, lughen a una una
Sas meravizas de su firmamentu
E de s'universu 'onzi tesoro

No!! No nerzas nudda
Faeddat su coro......!!

In te' su sole, s'aera in die jara
Cun su mare serenu 'e s'istiu
Tue su 'entu chi mi 'asat sa cara
S'abba jara de pasidu riu
Tue s'arvrescher in fiamas de oro

No !! No nerzas nudda
Faeddat su coro ......!!

It'est sa viola su lizzu sa rosa
It'est su eranu 'estidu 'e fiores
Tue lo superas in donzi cosa
In bellesa profumu e colores
Tue ses su sole in mesu insoro

No !! No nerzas nudda
Faeddat su coro.......!!

Tue ses sa ninfa de buscos galanos
In die 'e tempesta s'arcubalenu
Ses sa lughe de orizontes lontanos
Baddes e montes chi lean s'alenu
Tue ses s'aria chi 'onzi die assaporo

No !! No nerzas nudda
Faeddat su coro.........!!

Ses sa lagrima de sentimentu piena
Chi dae ojos mi curres in cara
A su boidu 'e sa manu m'enis giara
E lassas s'anima pasida e serena
Che rundine in beranu 'e logudoro

Tue ses una, tue ses cudda
Ses sa Venere c'adoro
No !! No nerzas nudda
Faeddat su coro....... !!