سارح لحالي

سارح لحالي.. في الملكوت
خوفي دايمًا.. من يوم ما أموت
قاعد بفكر.. انا هاعمل إيه؟
في اللي جرالي.. واللي بقيت عليه
لاقيتني بجري.. عليه قوام
أشكيله همي.. وأرمي الكلام
​
موجُه هادي.. بيريّح قلبي
كلامه دافي.. بيطيّر عقلي
تملي أروحله.. ألاقيه في ظهري
عُمري ما جيتله.. واتخلى عني
أحكي معاه.. ورده سحري
بس المرة دي.. فاجأني رده!
مش بس رده .. ده طلعلي منه
أجمل حورية.. في البحر عنده
عقلي طار.. من اللي شفته
حتى صوتها .. عمرى ما سمعته
لمستني لمسة.. غريبة كانت
أغمى عليا.. أعصابي سابت
صحيت لاقيتها.. ماسكة في إيديه
قالتلي اهدى.. وأثبت مكانك
مش حلم ده.. ولا خيالك
أنا جنب منك.. أنا قدامك

سمعت صوتك.. هزّيتلي قلبي
من غير ما أفكر.. طلعت أجري

ضمتني ضمة.. نسيتني حالي
معرفش مالي.. ولا إيه جرالي
توقيتها كان.. توقيت مثالي
كنت محتاج.. لقلب غالي
​
قربت مني.. وقالتلي احكي
أنا معاك.. سامعاك بقلبي
خطفتلي عيني.. وسحرتلي عقلي
سلمت نفسي.. وفضلت أرغي
طلعت ليها.. كل اللي عندي
سكت الكلام.. ونطقت عيوني
نسيت معاها.. ناسي وظنوني
بقت هي مرسى.. وبقت هي كوني
وعلى شطها.. هديت شجوني
مسحت دموعي.. بلمسة إيديها
وتغزل خيوط.. الأمل بعينيها
وقالتلي عيش.. الدنيا بقلبك
ما تخليش.. الأحزان تهدك

فضلت معايا.. لحد الشروق
وصوتها كان .. كله حنين وشوق
غابت في موجها.. بس سابتلي وعد
هفضل في قلبك .. دايما للأبد
أنا رزق جالك.. في عز السكوت
عشان تفتكر.. إنك لسه حي.. ومش هتموت