A SA MEMORIA

T’ant dadu sa medàglia a sa memòria
E t’ant bantadu comente un’eroe
Ma tzertu non t’at fatu bonu proe
Passare da sa vida a s’istòria
Ca non cherias fama e nen glòria
Chi pagu contan a tempus de oe
Ca su chi contat est vìver in paghe
E non de sos cipressos a s’umbraghe.

Non ti nd’importat russu o ucrainu
Ca totu frades semus sos umanos
Pilos de oro ambos arianos
Chena motivu in campu a s’affainu
Contra a su frade comente a Cainu
Cun bombas e mitràglias in sas manos
Pro cuntentare russu e americanu
Ch’iscudint crastu e cuant sa manu.

Como cun sa pandela imboligadu
Ti narant chi non t’an a ismentigare
Ma chie pranghet su fizu istimadu

Est mama chi non podes consolare
Ca como non ses fizu ma soldadu
Mortu chena cundenna de iscontare.