ዜማ ሰላም ግጥሚ Kebi Rasta

ዜማ ሰላም
                   ግጥሚ
                   Kebi Rasta

ድምፂ ጥይት ዓው ኢሉ፣ እዝንና ምስ ኣጽመመ፣
ጓይላ ሓጎስ ተሪፉ፣ መሬትና ምስ ደመመ።
ኣዴታት ብንብዓት፣ ገጸን ምስ ተሓፀባ፣
ህፃናት ኣብ ክንዲ ሳዕስዒት፣ ኣብ ጓል መንገዲ ሃለዋ።
ፍቕሪ ተሰዊሩ፣ ጽልኢ ቦታኡ ምስ ሓዘ፣
ልቢ ወዲ-ሰብ ብቂምን-ሕነ ምስ ነደደ።


እስኪ በሉ! ክራርና የልዕል፣ ዋጣና ይደረፍ፣
ዜማና ፃዊዒት ይኹን፣ ንኹሉ ልቢ የራኽብ።
ኣብ ክንዲ ድምፂ ውግእ፣ ድምፂ መዝሙር ይዓብለል፣
ሙዚቃ መሳርሒና ይኹን፣ ንሰላም ክንጓየል!
ግጥምና ሓድነት ይኹን፣ ቃናና ድማ ፍቕሪ፣
ንሰዓሮ ንውግእ ብኃይሊ ስምዒት፣ ብኃይሊ ዜማ ፍቕሪ።


ኣብቲ ጎዳጉዲ ኲናት፣ ዕምባባ ተኺልናሉ፣
ኣብቲ ዝነበረ መድረኽ ኲናት፣ መድረኽ ጓይላ ሰሪሕናሉ።
ኣዴታትና 'ዶ በሉ' ክብላ፣ ንውሉደን የደቅሳ፣
ካብ 'ወይለይ' ዝብል ዋይታ፣ ልሳነን ንዘልኣለም የዕርፋ።
መንእሰይ ብተስፋ ይስዕስዕ፣ መፃኢኡ የስተማስል፣
እታ ዝነቐፀት መሬትና፣ ብሓድነትና ክትሕረስ።


እስኪ በሉ! ክራርና የልዕል፣ ዋጣና ይደረፍ፣
ዜማና ፃዊዒት ይኹን፣ ንኹሉ ልቢ የራኽብ።
ኣብ ክንዲ ድምፂ ውግእ፣ ድምፂ መዝሙር ይዓብለል፣
ሙዚቃ መሳርሒና ይኹን፣ ንሰላም ክንጓየል!
ግጥምና ሓድነት ይኹን፣ ቃናና ድማ ፍቕሪ፣
ንሰዓሮ ንውግእ ብኃይሊ ስምዒት፣ ብኃይሊ ዜማ ፍቕሪ።


ሙዚቃ ስሚዒት እዩ፣ ምርሕሓቅ ዘይፈልጥ፣
ንዝተሰበረ ልቢ ዝፍውስ፣ ንዝተበተነ ህዝቢ ዝጥርንፍ።
ኣብቲ ዜማኡ ንሰማማዕ፣ ኣብ ቃላቱ ንራኸብ፣
ሓደ ህዝቢ ምዃንና፣ ካብኡ ንላዕሊ ንዛረብ።
ንሱ ድልድል እዩ፣ ካብ ጽልኢ ናብ ፍቕሪ ዘሰጋግር፣
ድምፅና ንሓደ ዕላማ፣ ንሰላም ጥራይ ከነሳግር።


ስለዚ ንዘምር፣ ብሓባር ንደረፍ፣
ድምፅና ዓለም ይስማዓዮ፣ ንቕድሚት ንሰለፍ።
ንሓዳስ ንግሆ፣ ንብርህቲ መፃኢት፣
ሙዚቃ ይኹን መብራህትና፣ ሰላም ትኹን ዓወትና!
ሰላም! ሰላም! ሰላም ንህዝብና!
ሙዚቃን ዜማ ሰሪሕኪ ልኣኩለይ