СЭЦЭН ХАНЫ АНДУУД

Ургах наранг түрүүлж тосдог тэнүүн тал
Уртын цээл аялгуу цуурайтсан хээр тал
Эзнээ баясгах угшил хурдан хүлгийн давхил
Эх түүхийн жимээр хөтлөх Сэцэн ханы нутаг аа...
Дахилт:
Ийм л сайхан нутагтаа төрж өссөн бид
Ирээдүйг өөрчлөх хүчтэй энэ цагийн эзэд
Тийм л сайхан нутагтаа хүн болсон бид
Тив дамнан нөхөрлөх үе тэнгийн андууд
Бид нутаг нэгтэй Сэцэн ханыхан
Бид удам нэгтэй уудам талынхан
Буурал түүхийн гэрч Бурхан халдун хайрхан
Будант хангайн чимэг Хэрлэн, Онон, Улз
Дэлхийн хүмүүний мэлмий гийсэн Дэлүүн болдог
Домог амилж, омог бадарсан Хэнтий нутаг аа.
Эрхэт төрийн тахилгат Алтан Дарь овоо
Эрийн хийморь сэргэдэг Шилийн богд уул
Харийн орныг зорихдоо хоргодонхон чуулдаг
Хун шувуудын мандал Ганга нуур Сүхбаатар нутаг аа.
Цагаан зээр цахилах Мэнэнгийн шаргал тал
Цаглашгүй ихээр ундрах газар эхийн тос
Энгүй талдаа мэлтэлзэх эх орны усан хил
Элсэн дэвсгэрт Буйр нуур Дорнод нутаг аа.
Дахилт:
Ийм л сайхан нутагтаа төрж өссөн бид
Ирээдүйг өөрчлөх хүчтэй энэ цагийн эзэд
Тийм л сайхан нутагтаа хүн болсон бид
Тив дамнан нөхөрлөх үе тэнгийн андууд
Бид нутаг нэгтэй Сэцэн ханыхан
Бид удам нэгтэй уудам талынхан