المواقف سلف

قالَ الفتى قيس ياصاحِ المَواقِف سَلَف
افعَل الخِير وامضِي، والقَضا بايِجِيك
لَبِّ وافزَع وبُكرَه بايِجِيك النَّكَف
ألف غَرّام نَشمِي يا رَفِيقِي وِشِيك
والرَّدِي ياضَنِينِي بايِشُوف ألف كَف
لَو مَعَه مال يُسفَح بايِضلِّي رَكِيك
لا دَعِيتَه يِغِيثَك اِنحَنَى وَانعَطَف
لا يَخُوض المَعارِك ومايِحِب العَرِيك
وإِن طَلَبتَه لِفَزعَة كُلّ جِسمَه رَجَف
فَسل خاسِي رَدِي يالَعن أبُوه مِن نَخِيك
ولو كُفو لادَعِيتَه جاك يِرمِي نِصَف
قال أَبشِر بِفَزعَة دام وَضعَك عَصِيك
سَمِّ وَاشرَح وَنِسرِي نَحوَ أَيِّة هَدَف
كُلّ نَشمِي مُحَنَّك بالشَّدايِد لَفِيك
إِي وَرَبّ العِباد الوَضع هذا اختَلَف
حَطّ كَمِّن مُحَنَّك تَحت خَطّ العَكِيك
بَس تِلقاه كَرَّار العَجَا مَا انحَرَف
بايِضلِّي مُواصِل لَو يِرُوح البرِيك
آح مِن وَقت عايب لَفّ بالجِيد لَف
وَأسعَد البَلطَجِي ذِي لِلدَّعارة يِحِيك
صار كَمِّن دَنِي عايِش حَياة الشَّغَف
وَعِندَه أَلفِين مَبنَى ومامَعَه أَيّ شَرِيك
يا رِجاجِيل وَقفَة واحِدَة صَفّ صَف
ضِدّ مَن كان فاتِر نَحبِك أَمرَه حَبِيك
لا أَنتَ ناقِص نَعُوفَك عِند أَقرَب مَلَف
وَعاد لَو كُنتَ مِنّا، مُوت صارِم غَزِيك
بانِشَعتِل بِمُخَّك يا عَدِيم الشَّرَف
قُبح فِعلَك وَقَولَك، مِنَّنا ما حَمِيك