ناس

[ناس...بتلبس جزم ]
كلمات..عبدالله حسن

في ناس بتلبس جزم
وجزم بتلبس ناس
وناس بتلمع جزم
اشرف كتير من ناس

وناس بتلحس جزم
علشان تراضي ناس
وناس ترمي الجزم
في وش اتخن الناس

وناس بتخاف ربنا
وناس بتخاف من ناس
وفي ناس،،، وناس زينا
و ناس اخبث من الوسواس

وناس بفلوسها تشتري ناس
وناس معدنها الماس
وناس تدوس على اي ناس
مقابل الغنا والماس

و ناس بنحبهم
باعونا واشترو اوسخ ناس
وبعد ماعرفو كدبهم
رجعو ملقوناش نفس الاحساس

وناس كتير ظلمونا
وياما ظلمنا من ناس
لما بالسكينه دبحونا
وقلنا عليهم تاج الراس

متأخدش بالظاهر
وبص في قلوب الناس

اياك تعاشر الرمم
وعاشر ولاد الناس

ناس ساكنه في البيوت
وشوارع ساكنه ناس
وناس تملك يخوت
وناس بتعاني من الإفلاس

وناس تجري ورا الفلوس
وفلوس تجري ورا ناس
وناس الايادي تبوس
والجوع ميذلش ناس

وناس بتسرق على كبير
والكبير بيسرق ناس
ولو سرق فقير
يقيمو حد القطع بفاس

يقولو العدل سيد الناس
والشرف هو الاساس

وناس بتخاف من ناس
و عمره ماخاف رب الناس
وناس تصون العيش والملح
وناس تزيد الجرح جرح

وناس ولاد اصول
يشيلو همك بالمقاس
بالفعل مش بالقول
دول ليك اهل وناس

والي يخون السر
احفظ سره بالترباس
بكره يمر العمر
ويدوق من نفس الكاس

مهما شفت من الحياه
اوعاك تقول انا سيد الناس
ارمي تكالك على الله
وإياك تتكل عالناس.