تيت توت

صوت بيقولي قوم يلا م النوم
مكان مش غريب عليا حتى الصوت مفقود من زمان ومليان حنيه
بحسس عل السرير الاقي كام لعبة
الدنيا ضلمة والسرير مش سريري
حتى ريحة المكان مش غريبة ومئلوفة ليا
النور فتح وستي بتقومني قوم افطر والبس للمدرسة
مبقتش فاهم
وازاي ستي عايشة وهيا من سنين ماتت
قومت جريت عل المراية ازاي ده انا ازاي رجعت حياتي ل قبل كام سنة
طلعت لقيت فطاري وريحه صبح باينة
قرأن شغال وكل الناس لسة نايمه
عمال بفكر بس فيه حتة مبسوطة فيا
روحت مدرستي القديمة عديت عل كل ذكرى ليا
شوفت فصلي ومكاني
شوفت قد اي ده كان زماني
شوفت اكبر حاجه كنت منها بعاني
كان اكبر همي عصايتين عشان ف الواجب بتدلع
كان ظني اني لسة اما اكبر هتمتع
قابلت اصحابي الل مبقتش عارف فيهم اجمع
خدتنا ايامنا وجامعتنا سابت حته عشان ما نتفرق
رجعت البيت ونسيت ازاي هرجع
نمت وصحيت ونزلت العب
قابلت كل الل اتفرقنا ورجعت عيل
رجعلي شغفي وبقيت عايز اكمل
كان فيا صحه وقادر اجري واشوط
كان لسة متقاليش العمر قرب يفوت
نمت صحيت قبل الجمعة روحنا لستي ام ابويا
شوفت عمي الل فارقنا وابن عمي الل زي اخويا
شوفت صورة جدي عل الحيطة بأكبر مقاس
شوفت ناس طالعة نازلة ف العمارة وبيت مفتوح امان
شوفت ستي وكان ضحكتها ماليه وشها
كان احلى فطار معاهم واحلى ايام عشتها
سابونا وروحهم لسة حوالينا
وعايشين بينا وسطينا
وفرحانين اكيد علشان فاكرين الل عاشو فينا
وصحيت دعيت اني انا اكمل
رجعت ودعيت اني اعرف اتحمل اعيش ف حياه انا ناسيها
ومش حاسب مكاني فيها
ياريت نرجع لكلو زمان ونكمل ونعيد ف فترة مش هزهق اني اعيدها
وازاي رجعتلي حياتي بعد اما شافت تاني بيتها