سوريا

وقفوني على الحاجز واطلبم مني الهوية
اي هوية
الهوية البيها اسمك
وبيها دينك
بيها رسمك
اني ماعندي هوية
عدنا بالرقة حواجز توقف وتنطي الهوية
وبالهوية كل شي واضح
اسمك ودينك وربك
وعلى هذا يكون حكمك
تدفع وتاخذ هويتك
وغير حاجز يذبحك من شاف اسمك
وبي حواجز تعدمك كرمال ربك
كلو كرمال الحواجز قمنا كسرنا الهوايا
صرنا نمشي بلا هوية
نقطع الحاجز سوالف
السوالف هي بارودي وسلاحي
واتلون مثل الوان الحواجز
متملق متزلف انبطاحي
يسئلوني
شنهو اسمك
بي حواجز اسمي حيدر
واقعد الطم واقصدلهم
هاذي ارضي كربلا
وكلهم شمر
وانت الحسين الذبيح
شمر راح وشمر طاح
وانت واقف ماتطيح
وبي حواجز اسمي عثمان وعمر
وتختلف بعض الحواجز عن بعضها
وهابية
وسلفية
وقادرية
وخزنوية
ورفاعية
هذي بعض من الحواجز
وبي حواجز بلا دين
ويسئلونك
شنو دينك
هينا بي عندي طريقة صورة للحاكم بجيبك
طالع الصورة وحبها
وهوس بروح القيادة
يرفع الحاجز تفضل يضحك ويضرب تحية
واختفت كل الحواجز واحنا لسا بلا هوية
وانبا حاجز جديد شكلو مو مثل الحواجز
ماطلب منا هوية
لاسئلني شنو اسمك
ولا سئلني منو ربك
رحب وهلا بتحية
من زمان الجاهلية
بلحج ودحج تفحص
اشقد تمعن طول ثوبي
بس لحيتي غطت عليا
ابتسم بسمة خبيثة قال عدي بس ماضرب ليا تحية
الورايا مالو لحية لابس مطقم افندي
شكثر شفتو بالجوامع
اني اعرفه شيخ من اهل الطريقة يخطب ويقرا موالد
راح ماعدا معايا ...
كلبشوه
ربطوه
طمشوه
شوهوه
المهم من بعدها مالمحته
من بعد هذا الصواب
قلت اهاجر
وهذا اني اليوم عدكم ناسي اسمي ومابي اثبات وهوية
ومالي بيت ومالي حارة
ومالي مستقبل وحاضر بس لي تاريخ وقضية
اسمي ثاير
اسمي عابر
اسمي جابر
اسمي هو كل الاسامي
بكيفك اكتب ...
ولا اقلك بالشغل اسمي اجير
وبالشوارع اسمي هذا
وبالنفوس اسمي المهجر
وجاري سماني الغريب
نقي من هاي الاسامي واكتب اسمي
وجنب اسمي سوري ماعنده هوية