لا عاد تسأليني

‏
‏*​وَعَمْ تِسْأَلِيني كِيفَكْ؟
‏وَكَأَنِّكْ مَا بْتَعْرْفِي كِيفْ الْوَجَعْ بيكُونْ
‏وْبَعْدِكْ عَمْ تِسْأَلِي وِبْتِسْأَلِي
‏وْمِشْ عَمْ تِسْمَعِي لَأَلْبِي وْدَأَّاتُو
‏يَلّي عَا غْيَابِكْ صَايِرْ مَجْنُونْ..*
‏(وْمِنْ بَعْدْ الغِيَابْ بْأِلِّكْ: لَا عَادْ تِسْأَلِينِي
‏وْمِنْ بَعْدْ الغِيَابْ.. اتْرِكِي لَأَلْبِكْ المَسْأَلِة
‏وْرُوحِي اسْأَلِي النِّجْمَاتْ
‏وْرُوحِي اسْأَلِي الضِّحْكَاتْ
‏بَرْكِي هِنِّي... يْخَبْرُوكِي!)
‏*​أَنَا بِالمَاضِي يِمْكِنْ كِنْتْ حِبّْ الشِّتي
‏وْرَمْشِت عْيُونِكْ لَمَّا تِضْحَكِي
‏وْكِيفْ كِنْتِي تِمْشِي وْحَدِّي تِتْلَبَّكِي
‏وْكِنْتْ حِبّْ الهَوَا وِالسَّهَرْ
‏وْالأَعْدِة مَعِكْ عَا ضَوْ الأَمَر
‏وْكِنْتْ حِبّْ الحَكِي..
‏لَكِنْ اليَوْمْ فِي شِي جُوَّاتِي اتْغَيَّرْ..
‏وْمِشْ عَارِفْ مِينْ أَنَا
‏وْمِشْ عَارِفْ إِذَا النَوْمْ بَعْدُو بْيَعْرِفْنِي
‏أَوْ حَتَّى الغَفَا..
‏وْإِذَا نُورِكْ بَعْدُو بْأَلْبِي أَوْ بِلَحْظَة انْطَفَا
‏وْمِشْ عَارِفْ شُو عِمِلْ فِينِي البُعْدْ
‏وْبْأَلْبِي شُو صَايِرْ مِنْ بَعْدِكْ..
‏مِدْرِي هُوِّي مِشْتَاقْ.. مِدْرِي صَايِرْ مَجْنُونْ!*
‏(وْمِنْ بَعْدِ الغْيَابْ بْأِلِّكْ: لَا عَادْ تِسْأَلِينِي
‏وْمِنْ بَعْدِ الغْيَابْ.. اتْرِكِي لَأَلِبِكْ المَسْأَلِة
‏وْرُوحِي اسْأَلِي النِّجْمَاتْ
‏وْرُوحِي اسْأَلِي الضِّحْكَاتْ
‏بَرْكِي هِنِّي يْخَبْرُوكِي..
‏وْلَا عَادْ تِسْأَلِينِي...)
‏