مجازا

#ذكريات_من_زمن_فات
#بمناسبة_عيد_الحب_المصري_الحصري =D
#مجازا_عيد_حب_جديد
مجازاً لو بديت القول
هاقول عاشق كما الاحباب
باحاول قدر إمكاني
أطوَّع م الحروف كلمه
بترسم ع الورق صوره
لعاشق قلبه حب وداب
واجيبلك ورد م الاحمر
وقلب احمر.. وكام دبدوب
واقولك:
كل عام وانتي .. حبيبتي ..
وع الجبين مكتوب
ونخرج بره نتفسح
ونسمع كلمتين م الناس
ولما اليوم ياروحي خلاص
بيجمع ضيُّه ويروَّح
نلِم ايدينا ونودَّع
في عيد الحب؟؟؟
كأن الحب يوم واحد بيجمعنا
ولما يفوت..
ويجري بشوق يودَّعنا
نعود مانحس بقلوبنا
ولا بشوقنا
ولا بخطوتنا في دروبنا
قوليلي ازاي؟؟
وانا عشقي لقلبك كل يوم بيزيد
بيخلص عيد
وفي اللحظه اللي بعديها بيحضر عيد
كأنك فرحتي الدايمه
وعيدي ف كل اوقاتي
ونور بيهل م الضلمه
بيتسرسب كما المَيَّه
ويرسم حلمنا الآتي
قوليلي إزاي؟؟؟
وانا اللي ف وقت ما ابقى وحيد
وتيجي تِمُرِّي بخيالي
باكون زي الطيور بجناح
وباسرق م القمر نوره
ومن شمسك خيوط دفيانه بالافراح
بحور عشقك..
بترمي الموج محبه وشوق
بيسحبني لبحر غريق
واسِّلم ليه وانا مغمض... وانا مآمن
وانا اللي عمري ما اعرفتش
في مره أعوم
بقيت عوَّام ... على ايديكي
وفي عنيكي...
بيظهر سرك الكامن
بكل وضوح
كتاب مفتوح
انا لوحدي قريته بكل تفاصيله
وقلبي بلهفه يناديله
ف بيْلَبِّي
ويزرع فرحه جوايا
بتطرح كل يوم جنه هنا ف قلبي
وحبي كل يوم بيزيد
ولحظة ما اللقا يجمع قلوب عاشقين
بيبقى العيد ... وراه العيد ... وراه العيد .. وراه العيد